Deu 24 | NdeIBE | STEP | Nxa indoda ingathatha umfazi kodwa angayithokozisi ngoba indoda ifumene ihlazo ngaye ibe isimlobela incwadi yokwehlukana, imnike, ibisimxotsha endlini yayo,

Deuteronomy 24

1 Nxa indoda ingathatha umfazi kodwa angayithokozisi ngoba indoda ifumene ihlazo ngaye ibe isimlobela incwadi yokwehlukana, imnike, ibisimxotsha endlini yayo, 2 kuthi esesukile endlini yaleyondoda athathwe ngeyinye indoda, 3 layo leyondoda eyesibili imsole imnike incwadi yokwehlukana, imqhubele ibe isimxotsha emzini wayo, kumbe leyondoda ife, 4 kutsho ukuthi indoda yakhe yakuqala, eyamalayo, ayivunyelwa ukumthatha futhi ngemva kokuba eselalelihlazo. Lokho kungaba yisinengiso emehlweni kaJehova. Lingalethi isono elizweni uJehova uNkulunkulu wenu alinika lona ukuba libe yilifa lenu.

5 Nxa indoda isanda kuthatha, akufanelanga ukuba ithunyelwe empini loba ukuthi iphiwe umsebenzi oqakathekileyo.

6 Lingathathi ilitshe lokuchola lembokodo loba imbokodo yodwa nje ukuba kube yisibambiso sehlawulo, ngoba ngokwenzenjalo uthatha ukuphila kube yisibambiso.

7 Nxa owesilisa angafunyanwa ethumba umfowabo wako-Israyeli abesesiyamgcina njengesigqili loba amthengise, kumele afe. Kumele liqede ububi phakathi kwenu.

8 Nxa kuyisifo sobulephero kumele linanzelele kakhulu lenze lokho abaphristi, bona abangabaLevi, abalilaya khona. Kumele lilandele khona kanye engabalaya ngakho.

9 Khumbulani lokho okwenziwa nguJehova uNkulunkulu wenu kuMiriyamu endleleni emva kokusuka kwenu eGibhithe.

10 Nxa umakhelwana wakho umeboleka loba yini ungangeni endlini yakhe ukuba uthathe lokho abambisa ngakho. 11 Mana phandle uyekele lowo omebolekayo alethe isibambiso kuwe. 12 Nxa kuyindoda engumyanga, ungayilala isibambiso sakhe silokhu sikuwe. 13 Buyisela isambatho sakhe lingakatshoni ukuze alale esembethe. Yena uzakubonga, kuzaphathwa njengesenzo sokulunga phambi kukaJehova uNkulunkulu wakho.

14 Ungabodlelezela umuntu oqatshiweyo ongumyanga loba oswelayo, loba engumfowenu wako-Israyeli loba owezizweni ohlala kwelinye lamadolobho enu.

15 Muphe iholo lakhe insuku zonke ilanga lingakatshoni, ngoba ungumyanga uthembe leloholo. Funa asuke akhale kuJehova ekusola, ube lomlandu wesono.

16 Obaba abayikubulawelwa izono zabantwababo, labantwana abafanelanga ukufela oyise; ngulowo lalowo kumele afele isono sakhe.

17 Ungavaleli owezizweni loba ongelayise ilungelo lakhe loba uthathe isambatho somfelokazi ukuze sibe yisibambiso.

18 Khumbula ukuthi wawuyisigqili eGibhithe uJehova uNkulunkulu wakuhlenga khona. Yikho ngikulaya ukuba wenze lokhu.

19 Nxa uvuna ensimini yakho ube usutshiya isikhwebu, ungabuyeli emuva ukuyasithatha, sitshiyele owezizweni, longelayise, lomfelokazi, ukuze uJehova uNkulunkulu wakho akubusise kuwo wonke umsebenzi wezandla zakho. 20 Nxa ubhula ama-oliva ezihlahleni zakho ungabuyeli ukuhlola amagatsha njalo. Okuseleyo tshiyela owezizweni, ongalayise, lomfelokazi. 21 Nxa uvuna izithelo zesivini sakho, ungabuyeleli futhi ukuvuna lapho osuvune khona. Okuseleyo tshiyela owezizweni, ongelayise, lomfelokazi.

22 Khumbulani ukuthi laliyizigqili eGibhithe. Yikho ngililaya ukuba lenze lokhu.